11/21/2007

حوار لطيف

السلام عليكم ورحمة الله وبركاته

سافر الاب تاركاً أبناءه صغارا معتمداً على الإتصال بهم من حين إلى آخر وبعد أن إنتشر إستخدام النت أصبحت الأمور ميسره فأصبح يراهما ويطمئن عليهما من خلال النت وفي آخر حوار له معهما دار بينهما هذا الحديث
.
الأب:
إزيكم يا ولاد عاملين إيه ؟ واحشينى أوى

الإبن:إزيك يا بابا
الإبنه الصغيره:كويسين يا بابا يا حبيبي إنت عامل إيه؟
الأب:الحمد لله ياحبايبى المهم إنتم
الإبن :خلى بالك يا بابا أنا ماشي من غير موبايل مع إن كل صحابي معاهم موبيلات إلا أنا يرضيك كده .
الأب:
لاميرضنيش بس يا حبيبي إنت لسه صغير في أولى إبتدائي هتعمل بيه إيه بس ؟
الإبن:هعمل بيه حاجات كتير يا بابا هلعب جيمز .وأرن على إصحابي وأكلم ماما وخلتو.
الأب:حاضر ياحبيبي من عينيه .تحب نوعه أيه
.
الإبن:مش عارف الإسم بس عاوزة بكاميرا وفيديو .عاوزة نوع يشرفنى يا بابا .
الأب:وإنت هتستعمل الفيديو في إيه يا حبيبي؟
الإبن:أصلى يابابا مبحبش أنقل ورا الميس فهصور شرحها وأجى البيت وأذاكر.
الأب:برافو عليك ياحبيبي أيوة كده .خلاص كلها يومين ويوصلك موبايل أحدث نوع وبكامرتين كمان علشان تذاكر كويس .
الإبن:
ماشي تمام ولو إن المفروض إنك كنت تجيبهولى من غير ما كنت أنبهك .
الأب:
معلش يا حبيبي بعد كده هبقي أخد بالى وحقك عليه .

لا إله إلا أنت سبحانك إنى كنت من الظالمين

13 comments:

Sherif said...

أول تعليق

ليه قلتى لا اله الا انت سبحانك انى كنت من الظالمين؟

علياء said...

صح أستاذ شيرين علقت بهذا الدعاء والذى يحمل بين طياته تنهيدة تعجب على ما آلت إليه الأحوال

أبوثابت said...

وعليكم السلام
حدث أمامى فى وسيلة المواصلات حوار بين ثلاثة من الشباب كل منهم فى يده (التليفون المحمول)..
تبادلوها مع بعضهم وأخذ كل واحد يستطلع ماعلى تليفون الآخر .
فإذا بالحوار يدور حول الأغانى والصور وآخر الألبومات ....فقلت : فى نفسى (طبعا) .
هذا هو الذى يريده الشباب من (المحمول).!!!!
وأشفقت عليهم إذ لم يجدوا ما يُعلى همّتهم ويرفع من أهدافهم

هـــــذا .والحوار لطيف حقا بين الأب وفلذات كبده . لكن يبقى ترشيد الإستهلاك عموما فى المجتمع وخصوصا من الأب والأم مع الأولاد

قال الله تعالى : (وإذا أردنا ان نهلك قرية أمرنا مترفيها ففسقوا فيها فحق عليها القول فدمرناها تدميرا).سورة
الإسراء رقم الآية16
وهنا لايفوتنى أن أقول لايجوز أن نبخل
بمشاعر الحب والرحمة والعطف والحنان للأولاد
اللهم زوج الشباب وارزقهم الأولاد البررة
اللهم آمين
أشكرك ياأستاذة علياء

علياء said...

صدقت أستاذ أبو ثابت أهم شيء ترشيد الإستهلاك . خاصة من ناحية الأب والأم

Sherif said...

هل يمكنى أن أدعوك الى مدونتى؟
اذا تفضلت طبعا

علياء said...

بالطبع أستاذ شيرين

السيد شبل said...

والله مدونة حلوة........
بس انت محتاجة تتعمقى ف المواضيع اكتر من كدة ... يعنى تحاولى تلمى بكل جوانب الموضوع
بس عموما مجهود كويس
على فكرة انا لسه بكتب جديد ع المدونات
وعرفت انى انا ممكن اضيف لينك لحد وانا ضيفتك عندى
.......
لالالا متشكرنيش ولا حاجة
...........
بس اتمنى انك تدخلى على مدونتى وتقوليلى رايك وفى موضوع عن الا شتراكيه بوجهة اسلاميه جايز يعجبك
.........
انا مدونتى اسمها
بلا اسم
اه والله
بلا اسم
واتمنى يكون لى لينك عندك

علياء said...

شكرا أستاذ السيد شبل وهتعمق اكثر في مدوناتى وهدخل على مدونتك بلا اسم ولكن لى سؤال لما سميتها بهذا الاسم؟

السيد شبل said...

اولا يا علياء
انا مش استاذ
اما اجابة السؤال عتعرفية لنا تدخلى على
----------------------------------------
غمضى عنيكى علشان هقول مفاجئة
---------------------------------------
بلا اسم
-----------------------------------------
لازم تلنكلينى عنك

السيد شبل said...

علياء لو فكرتى تعمليلى لينك......
يعنى لو فكرتى...........
وياريت تفكرى........
انا عايز اللينك بتاعى يكون
:
----------------------------------
السيد شبل..بلا إسم
----------------------------------
على فكرة انا ملاحظ ان مفيش لينكات عندك
------------------------------------
هيه
هبقى اول واحد

علياء said...

دخلت مدونة حضرتك أستاذ السيد شبل
طابعها سياسي
وعرفت مغزى بلا اسم
ولكنى لا اعرف كيف اضع لنك

صلاح شنان said...

الاخت علياء
حوار لطيف وجميل
بين الاب وابنه
لكن ليس كل مايطلبه الابناء
نلبه لهم
بدعوى اننا نحبهم ولا نريد ان نحرمهم
فقد تكون الاستجابة لطلبات الابناء تدميرا لهم ولا خلاقهم ومستقبلهم ونحن نظن اننا نحسن صنعا
ودائما وابدا لابد ان ينظر الاباء
الى فوائد الاشياء التى يطلبها ابنائهم
وهل هم فى حاجة اليها
وخاصة فى مثل سن الابن بطل حوارك
للاسف الشديد يا علياء هناك من الاباء من يضر بابناءه وهو لايدرى

شكرا لك على التفاتتك الجميلة
وادعوكى الى زيارة مدونتى
صيحة حق
مع تحياتى وتقديرى
صلاح شنان

السيد شبل said...

علياء انت بجد ما تعرفيش ازاى تعملى لينك؟؟!!!
ههه لا والله ... انا هقلك وهستنى الاجر من ربنا"سبحانه وتعالى"
...
بصى هتدخلى ع الداش بورد.. وبعدين تخاترى "لاى اوت" عارفاها..وبعدين هيظهرلك مربع كبير اختارى كلمة لينك اللى هتبقى موجودة.. هتدخلى جوة تضيفى اسم الموقع



http://bela-esm.blogspot.com/
مثلا مثلا انت طبعا براحتك
وبعدين تكتبى تحت الاسم بالعربى
السيد شبل..بلا إسم
مثلا مثلا
وبكده هيكون ليا لينك عندك
مثلا مثلا
سعيد قوي بمعرفتك ياعلياء